KAN CHHUNGKAW TUKTHUAN EI LAI BURMA MI PATHUM IN MIN RAWN LUHCHILH A MIN TIBUAI:
A hmasa in keini chhungkua hi hmeichhe awmlo, mipa hlang pali khawsa kan ni a. Hmeichhe awmlohna in hi chu inchhung khur bungrua leh inchhung khawsakah te hian a hriat deuh thin an lo tih hi chu a dik zia a tak ngei a hmutu chhungkua kan ni ve a, chutihlai erawh chuan hmeichhe awmlo na na na chu thu nawi pawh a tlem deuh thung. Zawnglai thiau pali kan awm tihna a nih chu. Chhungkaw thawm na bawrh bawrh chi kan nih lemloh avangin mi te angin nei ve le-lua lo mah ila inchhung khurah buaina em em hranpa pawh kan nei ngai lem lova, tin, kan chhungkua nilo atang phei chuan buaina kan tawk ngai lemlo, mahse hemi tuk hi chuan kan khawchhak lam unaute, ‘Burma mi’ kan tih pathumin kan tukthuan ei lai min rawn luhchilh thut mai a, min rawn tibuai ta tlat mai le…
Thawhtanni tuk a ni a, keini chhungkua pawh Chawlhni sa thing inchuh tur tlemazawng a la awm avangin tuk dang anglo takin kan tukthuan(Zing chaw tih a in sawi hi keini Mizo chuan tukthuan kan ti a, tlai chaw in tih hi zanriah kan ti thung) ei tur chu kan phur sarh hlawm mai a, a chuh chak chak kan tlai leh dawn a ni tih rilru a hre ran chungin chhung inkhawm kan neih zawh chuan kan tukthuan ei tur chu kan siam tan nghal a. Kan siam zo kan kil tan deuh chiah tih chuan kan in kawngkhar chu ‘in awm em…’ tih pah chuan an rawn kik ta dawt dawt mai a.
Kan in hi kawngpui atanga in chhawng chunglam a step a chhoh ngai anih avangin kawngkhar pakhat chiah luhna leh chhuahna a awm a, kawngkapui a mi an rawn luh chuan chumi atang vek lo chuan chhuahna tur dang a awm lo. Misual pawh rawn lut in tlanchhiat thut pawh ngai se tlanchhiatna tur dang a awm chuang lova, tukverh lah han zuan chhuah mai na chi lah a ni der lo, sang tak vek an ni hlawm tawp mai a. Hetiang hi kan dinhmun a ni tih an hriat vang nge, zing tukthuan eilai tak hi chuan anni ang ho hi ka lo beisei vak lovin an ring anga chu chu remchhangah hmangin sum leh pai lam kan neih deuh ringin min rawn luhchilh ta nge chu kan hre lova mahse kan beisei loh ber mai lai leh kan inrin loh ber mai lai kan tukthuan ei lai tak chuan min rawn thawng ta thut mai a.
Inchhung an rawn lut chu eng hriamhrei nge an rawn thawhchhuah pui kan hre hauh lova, an rawn in ak puar hlawm viau mai lehnghal a. Chutihlai erawh chuan an thil ah chu a thlawn mai a kei ni chhung min rawn pek tum an ni hauh lo tih chu an hmelah chuan a hriat theih nghal mai a. Pakhat chuan samurai nalh zet mai khawilai officer lian, mahni hlawh chhuah leh ‘ziah chhuah’ te hmanga chhungkaw ei baka in tha tawk sa a lirthei chi-thum chi-li lei nawn awn awn thei ho sitting room number -2 zawk banga ama kah ni miahlo khawilai thingtlangpa lehkha pawimawh tang lachhuak thei lovin an chhungkaw ro ve tumpang ki hnum tha zet mai amah tlawn nana a pek bula khawi sanctuary chhunga a ruk a mi zukchal kah ki a lei sak intar a han khang mawi zan mai atana itawm fahran mai chu a keng ran mai a. Tin, pakhat zawk bag ah lai atang chuan chemte te chhe zawk zawk lo tih hriat tak mai fawng hi a rawn lawr vung mai bawk a. A hma hruaitu ber chuan a bag ah chuan pistol nge enge a ah tih a hriat loh na a, thil eng engemaw chu a ak hnem hle a ni tih chu a puar that dan atangin a hriat nghal mai a.
Chutia min rawn luhchilh ta chu keini chhung tukthuan ei tur kil laih tawh pawh chu kan chawl deuh thap a, anni lah chu an hmel han enin Mizo pangngai henglai tualchhung mi an ni lo tih chu a hriat reng mai si a. Enge ka chhungkaw chungah lo thleng dawn tih reng a hriat ta lo. Rilruah chu hman deuh a misualin mi in an luhchilh a pawisa an laksak vel te kha a rawn lang zut zut mai a. Ka pa chuan bengvar chhuah in, “Enge in duh le…?” a lo ti a. Anni chuan, “In pawisa neih zawng zawng min pe rawh u…” an ti ta hauh lo mai a. Anmahni thil ah theuh chu an phawrh sawk sawk a, an hruaitu deuh ber chuan a rawn sawi chhuah hmasak ber chu, pai deuhhlek hian, “Inchhung bungraw chihrang hrang leh tar mawi chi te kan zuar a mamawh te in nei ve angem…?” tih a ni ta tlat mai le. An bungraw ah te chu chhoka chhuatah chuan an han phawrh zung zung a, an lo keng chikim phian mai lehnghal a. Samurai tar mawi chi atanga frying-pan a mawng bet theilo chi te, chemte lian leh chawhmeh chan chemte atanga thingzaina ara leh tuboh te, sahbon bawm atanga TV remote te, mobile phone charger chihrang hrang atanga sakawrbakcheh thleng mai chuan thil chihrang hrang chu an rawn phawrh ta ruih mai a. Kan thingpuife thlitna a lo tha tawh vaklo bawk a an rawn ken pakhat chu kan han lei sak hram a, tichuan an inkhung sawk sawk a, lawmthu an sawi a an kal liam leh ta nghal a, keini pawh chuan kan chhungkaw sport ve chikhat, samurai aiah thirfian hmang a chawhmeh han hawlh kual vel chu kan tan ve ta nghal a. An thil zuar min rawn luhchilh zet chu min tibuai hrep mai a, chawhmeh suah sa pawh a dai vek hman alawm le.
A ni lah taka, kan ramah hian khawchhak lam unaute Burma mi kan tih ho te leh Vai ho te, kan ram a sumdawng leh hna eng engemaw thawk a eizawng hi an tam hle mai a. Chutih laiin keini a ram leilung fa te hi kan ramah hna a vang kan ti a kan iak kan iak angreng lawi bawk si a. Heng ramdang mi kan tih ho zozai in an thawh ang hi a ram chhung mi te hian thawk peih ve ta ngat ila kan ramah hian hna a vang, eizawnna a vang hi kan ti kan ti in kei chuan ka ring lo reng reng. Hna a vang kan tih hi chu hna thawh duh bik leh duh loh bik kan neih thin vang leh kan thatchhiat rilru neihloh vang mai mai hi ni hian ka hre ve tlat. Sawrkar hna hi kan beisei vek ringawt a, a sawrkar hna lam in a lo daih thei bawk si lo. Lehkhathiam hna hmulo pawl te kan han din ngawt a, lehkhathiam nih chuan mahni lehkhathiamna kha sawrkar hna kher nilo hna dang ei zawn nana hman theih awm tak hi a ni a, engtinge maw hetiang pawlah te hian a tel pawh an tel zah loh hi ka ti ve thin. Sumdawnna han ti dawn ila, liantham deuh a bul tan a, dawr luah a, counter hnungah chair vir thei nen a inchhawp a, dawr signboard a eng ‘enterprise’ tih vel emaw tal tar loh chuan sumdawng ah pawh kan in chhiar bawk si lo.
Heng Burma mi ka rawn sawi te hian an dawr bungrua chu an ak mai a, dawr luah man an chawi lova, dawr luah man an hlep nghal phawt. Chutah customer in an rawn pan kher nghak lovin an mahni in intinah lut in an pan mai a, luh hnem na na na a, mi duhzawng an ken na na na chuan dawr tu tawk an lo awm leh nge nge thin bawk si. Dawr muk deuh dawrtu awm si lo dawr hming eng enterprise changkang deuh emaw a eng deuh phut thei a intar a mahse nilenga inhralh si lo, dawr luah man to ve fung si te ai chuan an nitin lakluh a tam daih zawk maithei asin. Mi mamawh tur ken thiam leh thiam loh kha a ni tawh mai a. Mahse keini chu MA val te chuan hetiangin mi inah thil zuarin a in ak kual duh der lo a. MA val thil zuar kual a mahni leh chhungkaw chawm zo nih ai chuan MA val inchei nalh zuar chhungte chawm hlawm a in la changkang satliah, mahni bike chhungte lei sak petrol man pawh thawk chhuak lo ni kan zak lo zaw tlat mai thin hi a pawi takzek a ni. “In fapa chu enge a nih tawh ?” “M.com a zo ve tawh a.” “Anih chu eng hna nge a thawh ve tawh a ?” “Hna a la hmu lova, engmah a la thawk lo a awm vel mai mai rih a ni…” Khai khai khai, a zahthlak lam mah mah lo maw le. Hna te chu a awm awm thawk se a ni mai alawm, mahni lehkha zir san pawh chhawr tangkai thiam hlei lo…tlaw lutuk mai.
Mi in a thawh peih a rilru a neih a, thawh hreh a neih loh phawt chuan kan ramah hian eizawnna tur a la tam lutuk. Tu’n ka tawng lo haw lo se CeeCee-a (of CeeCee Pickle), mi tam takin an nuihzat pawhin pickle ama siam hmangin a hming a chhera, ei a zawng thei alawm mawle. Kan ramah hnamdang an tam kan tih kan tih te hi heng hnamdang ho thawh ang hi thawk peih ila, anmahni aia tha a nih loh pawhin anmahni tluka tha in thawk ila, an rate ang tho inchhiar bawk ila tunge sen inang, kuthnu inang rau rauvah hnam dang aiin mahni hnam pui chhawr duh zawk lo ang? An thawh ang kan thawh ve vek chuan hna an nei lo anga, hna awmlohna ramah ei zawng turin an rawn lut ruih ruih lo tawp ang tih kei chuan ka ring tlat.
Chuvangin eng mi pawh ni in eng anga zir sang pawh ni ila, thawh hreh leh thawh peihloh leh thawh duh bik kan nei a nih chuan kan vannei fe te a nih loh chuan ei hmu a chhungkaw chawm thei khawpin kan ding chhuak hauh lo ang a. Chutih laiin matric pawh pass lo pawh ni ila thawh hreh kan neih loh a, rilru fim tak nen kan tih apiang taima tak leh remhre taka kan tih phawt chuan mi sawi hat khawp a hausa te ni pha lo mah ila chhungkua chu kan chawm em em ang tih hi ka ring tlat a ni. Thil thiam chihrang hrang te hi neih tum ve tur. Entirnan mipa tan mi in mau pum khat leh chem pakhat min pe se hralh sum chang thei thil engemaw talah chhuah theih tur. Engkim mai ‘ka thiam lo ang, ka thei lo ang, ka peih chi a ni lo…’ tih zel mai chuan ‘MA val whole thing square’ pawh ni sawmsarih in eng anga inla changkang tukhum sam phir pawh ni mah la i nupui fanau te chu i chhungte thawh chhuah sa choka ami bak in i chawm lo anga, i nupui stayfree man tur i nu leh pa i dil duk duk reng mai ang.
Chuvangin hei hi hria ila kan ram leh hnam tung ding a, ram ti hmasawn tur chuan mitin te hian eng hna mah thawk hreh lova mahni theih tawk a ke kan pen a ngai a ni tih hi. Chu chu kan ram leh hnam damna, hmasawnna leh changkanna atana keini Mizo mipui te’n a kan ram leh hnam laka kan bat a ni tih hi i hre thar leh ila a tha awm e. Keini a ram leilung fa te’n thawh hreh, thawh zah, thawh peih loh leh thawh duh loh kan neih zeng-zung mai chuan kan chhehvel ram atangin hnamdang kan thawh hreh, kan thawh zah, kan thawh peihloh leh kan thawh duhloh te thawk turin an rawn lut zel ang a, an service kan mamawh miau si avangin kan hnar thei si lo anga, reiloteah kan thlang Khasi ho ang deuh khuan chim ral in kan awm anga, kan ramah ngei hian hnamdang in sumdwnna lian leh dinhmun pawimawh tha zawng zawng an chelh anga keini a ram neitute hi kan ramah hian thu lo zet in kan hawi ve lawl lawl mai ang tih hi a hlauhawm riau mai a. Chuvangin Zofate a bikin keini thalaite hi khua a tlai hma hian i hrarh chhuak mawlh teh ang u khai.
BigDaddy Hmahmatea
(R.Lalhmangaiha)
Kulikawn