Ka movie en pakhata an inbiakna tawngkam hi a mawi dangdai riau a sin..
Darcy : Did you choose not to kill me cause I got a wife and a kid?
Victor : No. I didn’t kill you because they’ve got you…
Darcy thah a nih lohna chhan hi nupui leh fa a neih vang lam ai mahin a nupui leh a fa tan pa leh pasal a nih vang zawk a ni. A nihna takah chuan amah vang ni lovin a nupui leh a fa vang zawka nungdama awm a ni.
He tawngkam hi ka ngaihtuah ka ngaihtuah a, ka rilru pawh Gospel lam hawi zawngin a kuaiher ta reng a ni. Hetiang deuh bawk hian dam taka tun hun kan la hman theihna chhan hi keimahni lam vang ni lovin min neitu Pathian vang chauh a ni. (Tihborala ka awm lo hi LALPA zangaihna a lo ni, a lainatnate chu a kang ngai loh avangin. TH 3:22).
Chhandamna chang tur pawhin kan hausakna leh felna te, Kristian kan intihna leh Pathian kan hriatna ringawt hi a pawimawh ber lo va, Pathian mi hriat nihna hi a pawimawh ber zawk chu a ni (Ref. Galatia 4:9). A hnen kan thlen theihna pawh kan thawhchhuah ni lovin khawngaihna avanga ama zara ringtuten kan chan liau liau a ni.
Beram chu neitu an awm vang chauhva him a ni lova, a duhna lam lama a pen bo va a boral loh nan a neitu in a veng a; amah ti na thei chinghnia leh sa dangte lakah a tiang leh a talhtum hmanga a venhim tlat thin vang zawk a ni. A lo thanlena a lo thau theih nan chaw leh tui awmna ah te a hruai thin. Ringtute pawh hmelma leh sualna hrang hrang min tiboral thei tu te laka kan him theih nan min neitu Pathian in a Kohhran hmangin min hum a, ama duh dana kan thanlen theih na turin inkhawm te, tawngtai leh Pathian thu hmangte in min chawm thin a lo ni. A kutphah ropui chhunga in nghah hi himna a ni a, amah hlata awm hi boralna a ni.
“Ka Chhandamtu min vengin a hnai reng,
Thil engpawh lo thleng se ka him a ni;
..Pathian ngei chuan min ven vangin ka him,
A kutphah ropui chhungah..”